Искусниот фудбалер Јорданчо Наумоски продолжува да испишува значајни страници во својата кариера, откако сезонава стигна до својата петта промоција од Втората во Првата македонска фудбалска лига.
Наумоски оваа сезона беше дел од Брегалница, која ја освои шампионската титула во Втора македонска фудбалска лига и од следната сезона повторно ќе настапува во македонската елита.
За 31-годишниот фудбалер ова е петти ваков успех во кариерата, со што уште еднаш потврдува дека се работи за играч кој знае како се освојуваат шампионати и обезбедуваат промоции во повисок ранг.
Интересно е што дури двапати успеал да избори влез во Првата лига со Победа. Првата промоција ја оствари во сезоната 2015/2016, а вторпат тоа му успеа во сезоната 2021/2022.
Во сезоната 2020/2021 Наумоски беше дел од Тиквеш, со кој исто така обезбеди влез во елитното друштво, додека во сезоната 2023/2024 успеа да стигне до прволигашка промоција и со Пелистер.
Фудбалската кариера Наумоски ја започна во 11 Октомври, а како млад талентиран фудбалер беше дел и од младинскиот погон на данскиот Брондби.
Во својата богата кариера на домашната сцена настапуваше и за Металург, а зад себе има големо искуство во македонскиот фудбал, каде со години важи за еден од најискусните и најсигурни играчи во второлигашката конкуренција.
Со пет промоции во кариерата, Јорданчо Наумоски дефинитивно се вбројува меѓу фудбалерите кои оставиле силен белег во битките за влез во Првата македонска фудбалска лига.
