Во четврток, на 28 мај, фудбалското внимание во прилепскиот регион ќе биде насочено кон Житоше, каде што ќе се одигра големото финале од Купот на Општински фудбалски сојуз Прилеп.
Во битката за трофејот силите ќе ги одмерат ФК Братство 07 Житоше и Влазними Јуниор од Пресил, а натпреварот ќе се одигра на стадионот во Житоше со почеток од 17:00 часот.
Од редовите на домашниот клуб упатија повик до љубителите на фудбалот и до жителите на Житоше да присуствуваат на натпреварот и да создадат вистинска финална атмосфера на трибините.
Се очекува интересен и неизвесен натпревар, во кој двете екипи ќе се обидат сезоната да ја крунисаат со освојување на трофејот во Купот на ОФС Прилеп.
Финалните натпревари традиционално носат посебна емоција, а во Житоше се надеваат дека пред полни трибини ќе бидат сведоци на вистински фудбалски спектакл.
Во минатото екипата на Братство 07 од Житоше се натпреваруваше во Втора лига – Исток.
