Прволигашот Арсими останува без еден од своите искусни фудбалери, откако Малиќ Белули официјално објави крај на својата професионална фудбалска кариера.
31-годишниот фудбалер во редовите на Арсими пристигна во февруари 2025 година од Беса Добри Дол, а во текот на својата кариера настапуваше и за Гостивар, каде ги направи првите фудбалски чекори, потоа за Генч Калемлер, Влазерими, Скопје, како и за косовскиот Феризај, каде градеше и интернационална кариера.
Белули преку емотивна порака се прости од фудбалот, истакнувајќи дека спортот за него бил многу повеќе од игра.
„Денес е еден од најтешките денови во мојот живот, бидејќи денес не ја завршувам само мојата кариера, туку денес се збогувам со сонот што го живеев секој ден, бидејќи како дете кога ја држев топката во рацете и сонував на улиците и малите терени, никогаш не замислував дека ова патување ќе ми даде толку многу емоции и толку многу спомени што ќе ме придружуваат до крајот на мојот живот. Фудбалот не беше само игра за мене, тоа беше мојот живот, тоа беше мојата радост во добрите денови и мојата сила во тешките денови. Плачев од радост, но и од болка, победував, губев, но никогаш не се откажував, бидејќи секој пат кога ќе влезев на теренот, ја давав својата душа. Сакам да им се заблагодарам на моето семејство кое се жртвуваше со мене на секој чекор од патот. Без вас, денес немаше да бидам тука. Благодарам на тренерите кои веруваа во мене, кои ме кренаа кога паднав и кои во мене видоа повеќе од само играч. Им благодарам на моите соиграчи, не бевте само тим, вие бевте мои браќа во секоја битка. А навивачите, вие бевте гласот што ме туркаше напред кога немав повеќе сила, вие бевте причината зошто никогаш не се откажав. Денес го напуштам теренот, но дел од мене секогаш ќе остане таму – во секој чекор, во секој гол, во секоја емоција. Не е лесно да се каже „готово е“. Не бев совршен, но едно е сигурно затоа што дадов сè од себе и за тоа сум многу горд. Му благодарам на фудбал за сè што ми дадовте, ви благодарам што сте дел од мојата историја…“, вели Малиќ Белули.
Со својата борбеност, искуство и посветеност, Белули остави белег во клубовите за кои настапуваше, а неговото име ќе остане запаметено кај навивачите и соиграчите со кои ги делеше фудбалските моменти низ годините.
