Струмица конечно ќе добие современ затворен базен, откако по три години застој повторно продолжува изградбата на овој значаен спортски објект. Со инвестиција на Владата и Министерството за спорт, градежните активности повторно се во тек, а според најавите базенот треба да биде завршен до крајот на јануари 2027 година.
Министерот за спорт, Борко Ристовски, заедно со Петар Јанков, извршија увид во тековните градежни работи и изразиле задоволство од динамиката со која се реализира проектот, при посетата на Ристовски во Струмица на 15 мај.
„Со гордост можеме да објавиме дека она што беше започнато во 2023 година и оставено да стои три години, сега продолжува да се гради со забрзано темпо. До крајот на јануари 2027 година базенот ќе биде целосно завршен и предаден на Општина Струмица. Ова е уште една потврда за нашата решеност да ги завршиме сите започнати и запоставени проекти од претходната власт и да создадеме подобри услови за спорт и активен живот на младите. Инвестициите во спортската инфраструктура остануваат еден од нашите главни приоритети, затоа што спортот заслужува современи услови, а граѓаните – објекти што ќе бидат ставени во нивна функција. Продолжуваме да ги завршуваме проектите што предолго чекале да бидат вистински реализирани“, вели министерот Ристовски.
Изградбата на базенот во Струмица претставува еден од најзначајните спортски инфраструктурни проекти во регионот, а неговото завршување ќе овозможи подобри услови за тренинг, натпревари и развој на пливањето и спортот воопшто во југоисточниот дел од Македонија.
