Во Штип денес владее вистинска фудбалска еуфорија, бидејќи Брегалница и официјално ќе го добие шампионскиот пехар за освоеното прво место во Втората македонска фудбалска лига и обезбедениот директен пласман во елитното друштво на македонскиот фудбал.
Штипските „сини“ зад себе оставија тешка, но исклучително успешна сезона, во која со многу борба, квалитет и континуитет успеаја да ја остварат главната цел – враќање во Првата лига.
Четата предводена од стратегот Влатко Костов покажа шампионски карактер во текот на целата сезона, а денес заедно со своите навивачи ќе го прослави големиот успех.
Од 16:30 часот на Градскиот стадион во Штип, Брегалница ќе го одигра натпреварот од последното, 30. коло против Победа од Прилеп, по што ќе следува свечената церемонија на доделување на шампионскиот пехар.
Се очекува трибините да бидат исполнети со емоции, песни и аплаузи, а верните навивачки групи „Фаланга“ и „Ултра Банда“ уште еднаш од трибините ќе им оддадат признание на фудбалерите кои му ја вратија прволигашката радост на Штип.
Штип од следната сезона повторно ќе гледа прволигашки фудбал, а Брегалница заслужено се враќа таму каде што припаѓа – меѓу најдобрите.
