Реванш натпреварот од финалето во ЕХФ Европскиот Куп помеѓу ГРК Охрид и унгарска Татабања предизвика огромен интерес, откако билетите беа распродадени за само 15 минути.
На 31 мај, салата „Билјанини Извори“ ќе биде исполнета до последното место, а повеќе од 3.000 навивачи ќе создадат атмосфера за паметење покрај Охридското Езеро.
Охридскиот тим влегува во двомечот со јасна цел и огромна мотивација, свесен дека ова е историски момент за клубот. Прво го очекува гостувањето во Унгарија на 24 мај од 17:00 часот, а потоа реваншот на домашен терен.
Во клубот владее силна еуфорија, но и фокус – да се извлече поволен резултат на гости и потоа пред преполната сала да се нападне европскиот трофеј.
Интересот за финалето уште еднаш покажа дека Охрид живее за ракомет, а градот веќе дише во ритамот на најголемиот клупски предизвик досега.
