Ракометарите на Еурофарм Пелистер славеа на тешкото гостување кај Охрид со 22:25 и направија огромен чекор кон освојување на второто место во македонската Супер лига, кое носи пласман во европските натпреварувања.
Битолскиот состав уште од самиот почеток наметна свое темпо и постепено ја градеше предноста. Одлична партија на голот имаше искусниот Никола Митревски, кој со серија важни интервенции беше еден од најзаслужните за контролата на натпреварот од страна на „зелено-белите“. На полувреме гостите заминаа со сигурни 10:16.
Во вториот дел Пелистер продолжи со сигурна игра и во еден момент имаше и осум голови предност. Охрид се обиде да се врати во натпреварот, намали на неколку пати, но гостите не дозволија пресврт и рутински го приведоа мечот до крај.
Најефикасен кај Еурофарм Пелистер беше Богдан Радивојевиќ со осум погодоци, додека Кузмановски додаде четири. Голманот Никола Митревски повторно беше во препознатливо издание и запиша дури 16 интервенции. Кај Охрид, Јасухира постигна пет гола, а Пилиповиќ имаше 11 одбрани.
Со оваа победа битолчани се искачија на второто место на табелата и во последното коло сами ќе решаваат за својата позиција во шампионатот.
