Вечерва на Националната арена „Тодор Проески“ во Скопје ќе се одигра големото финале од Купот на Македонија меѓу Силекс и Шкендија, а кое финале стартува во 20 часот.
Силекс ќе го игра своето шесто финале во Купот на Македонија, тимот од Кратово има три Куп титула од 1994 година кога беше освоена првата, 1997 година беше освоена втората, а по долг пост во 2021 година беше освоена третата Куп титула.
Силекс има уште две финалиња од 1995 и 2022 година кои ги загуби.
Дарко Анѓелески, капитенот на Силекс вели дека ќе гледаме одлично финале, предводникот на кратовчани верува во квалитетите на тимот.
„Ова е најважниот натпревар за нас сезонава и подготвени сме да го дадеме максимумот за да го освоиме трофејот. Знаеме дека не очекува тежок противник, но веруваме во нашите квалитети и во тимскиот дух. Се надевам на добро финале, фер игра и радост за нашите навивачи на крајот“, изјави капитенот на Силекс, Дарко Анѓелески.
Шкендија е во обратна ситуација – има две Куп титула од 2016 и 2018 година, а три финалиња загуби – во 2006, 2013 и 2017 година.
Капитенот на Шкендија, Арбин Зејнулаи, истакна дека клубот секогаш има највисоки амбиции.
„Шкендија секогаш пред почетокот на сезоната игра за титули дома и добар настап во Европа. Ова е многу важен меч за нас и ако го дадеме максимумот, мислам дека на крајот ќе стигнеме до трофејот“, изјави Зејнулаи.
Утрешното финале ќе биде 34. издание од Купот на Македонија.
