Во Подгорица денеска беше направен значаен чекор за иднината на ракометот во регионот, откако беше потпишан Договорот за формирање на регионални лиги во машка и женска конкуренција.
Договорот го потпишаа ракометните федерации на Македонија, Србија и Црна Гора, со што официјално беше потврдена заедничката определба за подигнување на квалитетот на натпреварувањата, развојот на младите ракометари и создавање подобар ракометен амбиент во Југоисточна Европа.
Според најавите, регионалната машка лига ќе брои десет клубови, од кои четири ќе бидат од Македонија, четири од Србија и два од Црна Гора. Во женска конкуренција, пак, ќе учествуваат десет екипи од пет држави – Македонија, Србија, Црна Гора, Хрватска и Словенија, со по два клуба од секоја земја.
Целта на проектот е создавање поконкурентен систем кој ќе донесе повеќе квалитетни натпревари, подобри услови за напредок на младите играчи и тренери, како и поголема медиумска и комерцијална вредност на ракометот во регионот.
Посебно значење на оваа иницијатива ѝ дава фактот што проектот е резултат на заедничка соработка меѓу федерациите и клубовите, базирана на партнерство, доверба и заедничка визија за иднината на регионалниот ракомет.
Потписниците на договорот изразија уверување дека новите регионални лиги уште од првите сезони ќе донесат дополнителна атрактивност за навивачите, поголем интерес кај спонзорите и нов импулс за развој на ракометот во сите земји учеснички.
Во следниот период ќе биде формирана заедничка канцеларија на лигите, по што ќе бидат дефинирани организациските и натпреварувачките модели, како и календарот за старт на новото регионално натпреварување.
Со денешното потпишување започнува ново и амбициозно поглавје во регионалниот ракомет, со јасна цел – создавање модерна, стабилна и квалитетна лига која ќе биде гордост за целиот регион и европскиот ракомет.
