Преку фотографиите ја доловуваме атмосферата од последниот тренинг на фудбалерите на Силекс пред утрешното финале од Купот на Македонија против Шкендија.
Фудбалерите на Силекс вечерва го одработија последниот официјален тренинг на Националната арена „Тодор Проески“ во Скопје, каде утре ќе се игра 34. финале од Купот на Македонија со почеток од 20 часот.
Кратовци се максимално мотивирани и подготвени за големиот предизвик, а во таборот на Силекс владее позитивна атмосфера пред натпреварот кој може да донесе нов трофеј во клупските витрини.
Силекс утре ќе игра за својата четврта Куп титула во историјата, а ова ќе биде седмо финале за клубот од Кратово. Првиот трофеј Силекс го освои во 1994 година, вториот во 1997 година, додека третата Куп титула пристигна во 2021 година. Кратовци играа финале и во 1995 година, како и во 2022 година, кога останаа без трофејот.
Како што веќе објави Спортска Мрежа, делегирани се и судиите за утрешното финале на Националната арена во Скопје, каде се очекува вистински фудбалски спектакл меѓу Силекс и Шкендија.
