Екипата на Мулти Есенс повторно ќе биде дел од Супер лигата на Македонија, откако со убедлива победа над Драчево Јуниор од 39-25 го завери првото место во Првата лига и промоцијата во елитното друштво.
Тимот предводен од Миле Бочкаровски одигра одлична сезона и сосема заслужено се враќа меѓу најдобрите, по две години минати во Првата лига. Мулти Есенс шампионатот го заврши со импресивен учинок од 23 победи и само еден пораз на 24 одиграни натпревари.
Во последниот натпревар сезонава, пред домашната публика, најрасположен беше Бобан Поповски кој постигна осум голови, додека Немања Џигеровски додаде седум погодоци. Во редовите на Драчево Јуниор се издвои Димитар Петковски со пет реализации.
Мулти Есенс со млад и талентиран состав покажа дека има квалитет за настап во најсилната македонска ракометна конкуренција, а следната сезона љубителите на ракометот со големо внимание ќе ги следат настапите на овој амбициозен тим во Суперлигата.
