Стрелачкиот клуб „Охрид“ официјално ги покани сите активни членови, рекреативци, пријатели и љубители на спортското стрелаштво да бидат дел од првото издание на турнирот „Охрид Опен 2026“, кој ќе се одржи на 23 мај на стрелиштето Бејбунар во Охрид.
Станува збор за прв отворен турнир во спортско стрелаштво со огнено оружје, а натпреварувачите ќе можат да се натпреваруваат во две дисциплини – пиштол на 25 метри со фиксна мета и карабин на 80 метри.
Во дисциплината карабин на 80 метри ќе се гаѓа со репетирачки карабин, во стоечки став и со механички нишани, а натпреварувачите ќе имаат по 10 истрели во времетраење од три минути. Метата ќе биде силуета од диво прасе со димензии 70х40 сантиметри.
Организаторите објавија и детална програма за турнирот. Пристигнувањето на учесниците е предвидено од 09:30 до 10:00 часот, по што ќе следува официјално отворање на турнирот.
Првата партија започнува во 10:30 часот, втората во 11:10, третата во 11:50, четвртата во 12:35, петтата во 13:15, а шестата во 13:55 часот. Завршувањето на натпреварите е планирано за 14:25 часот, по што од 14:30 до 15:00 ќе се одржи церемонијата за прогласување, доделување награди и официјално затворање на турнирот.
Котизацијата за учество во една дисциплина изнесува 600 денари, додека за втора дисциплина се доплаќаат 400 денари. За учество во двете дисциплини вкупната котизација изнесува 1.000 денари.
Пријавувањето се врши преку е-маил на sk.ohrid@yahoo.com, најдоцна до 20 мај, додека уплатата на котизацијата треба да се изврши најдоцна до 22 мај до 14 часот на сметката 250 000 300 12 98 48 во Шпаркасе Банка Охрид.
Од Стрелачкиот клуб „Охрид“ апелираат сите учесници да ги почитуваат правилата за безбедно ракување и користење на оружје, со цел турнирот да помине во спортски и безбеден дух.
