Возбудувањата во Општинската фудбалска лига Битола продолжуваат и по крајот на регуларниот дел, откако в сабота ќе се одиграат бараж натпреварите кои ќе одлучуваат за опстанок и пласман во Општинската А лига.
На стадионот во Црно Буки ќе се водат две големи битки. Екипите на Новаци 2011 и Црна Река ќе се борат за зачувување на својот статус во А лигата, додека Буково и Златни Деца ќе се обидат да обезбедат место во повисокиот ранг.
Во првиот бараж натпревар со почеток од 15 часот, Новаци 2011 ќе се соочи против Златни Деца, додека од 17 часот на теренот ќе излезат Црна Река и Буково.
Новаци 2011 регуларниот дел од сезоната го заврши на седмото место во Општинската А2 лига, додека Црна Река беше седмопласирана на А1 лигата. Од друга страна, Буково сезоната во Б лигата ја заврши на третото место, а Златни Деца беа четвртопласирани.
Влогот на овие натпревари е огромен, бидејќи поразените екипи од следната сезона ќе настапуваат во Општинската Б лига, која претставува петти ранг на натпреварување во рамки на општинскиот фудбал во Битола.
Се очекуваат неизвесни и борбени натпревари, во кои секоја грешка може да биде пресудна во битката за место во Општинската А лига.
