Во рамки на деветтото коло од плеј-офот во македонската Супер Лига, ракометарите на ГРК Охрид ги очекува големо дерби против РК Еурофарм Пелистер во битката за второто место на табелата. За охриѓани овој натпревар доаѓа во важен момент, непосредно пред првиот финален натпревар од ЕХФ Европскиот Куп, па избраниците на Ројевиќ, ќе сакаат со позитивен резултат и добра атмосфера да влезат во европскиот предизвик.
Во таборот на Охрид владее голема мотивираност пред дуелот, а ракометарите најавуваат максимална борба и желба за победа на домашен терен. Еден од оние кои очекуваат вистинска битка е Ален Ќосевски.
„Нè чека вистинско дерби, борба за второто место во Супер Лигата. Играме на домашен терен и ќе се бориме до крај со цел да покажеме дека сме тим што никогаш не се предава. Очекувам жестока битка. Подготвени сме да го дадеме нашиот максимум.“- изјави Ќосевски.
Натпреварот помеѓу ГРК Охрид и РК Еурофарм Пелистер се игра во среда (20 мај) во салата „Билјанини извори“ со почеток од 19:00 часот.
