Македонскиот репрезентативец Александар Љафтов и неговиот тим Елоре ја завршија сезоната 2025/2026 со второто место во унгарскиот шампионат. Во финалната серија од плејофот, Елоре го запиша и третиот пораз од Фино Капошвар, овојпат со 0:3 (19:25, 13:25, 20:25), па ривалот со вкупни 3-1 ја освои титулата.
Љафтов и неговите соиграчи се надеваа дека ќе успеат да изборат мајсторка, но домаќинот одигра сигурен натпревар и пред своите навивачи го прослави шампионскиот трофеј.
Македонскиот одбојкар беше во стартниот состав и одигра цел меч, притоа освојувајќи шест поени, од кои пет од напад и еден ас-сервис. Со тоа беше меѓу поистакнатите играчи во тимот на Елоре.
Иако останаа без титулата во домашното првенство, сезоната за Елоре сепак беше успешна, бидејќи клубот го освои трофејот во средноевропската МЕВЗА лига, а стигна и до финалето во Купот на Унгарија.
По крајот на сезоната, Љафтов ќе има краток одмор, а веќе на 20 мај треба да му се приклучи на националниот тим и да му се стави на располагање на селекторот Јошко Миленкоски за настапите во Европската лига.
