Раководството на клубот продолжува со градење на тимот за наредната сезона, па така кондициониот тренер Матеј Јовановски и официјално ја продолжи соработката и ќе остане дел од стручниот штаб предводен од Иван Чупиќ.
Од клубот истакнуваат дека Јовановски во текот на целата сезона покажал сериозен и професионален пристап во работата, а неговиот придонес бил значаен во унапредувањето на физичката подготвеност на ракометарите.
Покрај продолжувањето на соработката со кондициониот тренер, клубот промовираше и млад ракометар во првиот тим. Никола Нечовски потпиша договор на три сезони и ќе добие можност да се докажува во сениорска конкуренција.
Младиот ракометар бил лично селектиран од тренерот Иван Чупиќ и спортскиот директор Владо Недановски, кои веруваат во неговиот потенцијал и развој.
Од клубот посочуваат дека промоцијата на Нечовски треба да биде дополнителен мотив за сите играчи од младинските категории, како доказ дека со сериозен пристап, работа и напредок може да се стигне до првиот тим.
Нечовски во следната сезона ќе биде дел од ротацијата на плејмејкерската позиција, каде главниот товар се очекува да го понесат Јака Малус и Матео Фадуил.
