Учениците од СОУ „Ристе Ристески – Ричко“ од Прилеп продолжуваат со одличните настапи на Европското првенство во футсал за ученици до 18 години кое се одржува во Бања Лука, откако обезбедија пласман во четвртфиналето како второпласирана селекција во својата група.
Младите прилепчани, кои како државни шампиони ја претставуваат Македонија на овој голем европски настан, покажаа борбеност, квалитет и карактер против силна конкуренција од целиот континент.
На стартот од шампионатот македонските претставници одиграа драматичен натпревар против Словачка кој заврши 4:4, а израмнувачкиот погодок го постигнаа во самиот финиш. Стрелци за Македонија беа Теодор Героски, Андреј Паскоски, Мартин Деркоски и Димитар Оклески.
Потоа следуваше убедлив настап против Унгарија, каде прилепчани целосно доминираа и славеа со високи 10:1, додека во уште една вистинска драма ремизираа 5:5 против Белгија, селекција која важеше за еден од фаворитите во групата.
Со овие резултати, учениците од СОУ „Ристе Ристески – Ричко“ успеаја да обезбедат место меѓу најдобрите осум селекции на Европското првенство.
Дополнителен мотив и поддршка за младите футсалци беше посетата од македонските репрезентативци и членови на Борац Бања Лука, Дамјан Шишковски и Себастијан Херера, кои ги посетија во нивната база и им посакаа среќа пред клучните натпревари.
Од училиштето пред заминувањето во Бања Лука порачаа дека се горди што нивните ученици ја претставуваат Македонија на европската сцена и изразија уверување дека момците ќе го покажат својот спортски дух, борбеност и квалитет.
Европското првенство во футсал за средношколци обединува 15 екипи од 11 земји, а Македонија преку СОУ „Ристе Ристески – Ричко“ достојно се претставува на големата сцена во Бања Лука.
Нашата репрезентација е составена од Виктор Анѓелевски, Мартин Деркоски, Теодор Героски, Ведран Магленски, Леонид Митрески, Димитар Оклески, Давид Паскоски, Андреј Петрески, Бернис Селимоски, Бруно Стефаноски, а е предводена од тренерот Илија Ангелески и неговиот асистент Христијан Митрески.
Судија кој дели правда на Европското првенство во Бања Лука од Македонија е Димитар Здравески.
