Македонските млади тениски надежи Сара Митевска и Кристијан Јанев се победници на турнирот Ј30 Скопје – Поинтер опен 2026, кој се одржа на терените на ТК Поинтер Тенис Парк.
Митевска имаше одличен настап и до трофејот стигна без ниту еден загубен сет. Во финалниот меч таа ја совлада втората носителка Нор Кулеманс од Белгија со 6:3 и 6:2. На целиот турнир македонската тенисерка загуби само 22 гема на пет одиграни натпревари.
Претходно, Митевска беше сигурна и против Јоана Менцелоу, Ива Колев, Марија Чалкова и Есенија Бејлокова, потврдувајќи ја одличната форма во текот на целиот турнир.
Во машкото финале, Јанев по голема борба славеше над Богдан Мандиќ со 2-1 во сетови. Македонскиот тенисер го доби првиот сет со 7:5, противникот израмни со 6:4, а во решавачкиот сет Јанев беше убедлив и победи со 6:2.
На патот до титулата, Јанев оствари победи и против Никола Ивасковиќ, Бенџамин Смит, Алберт Иван и Марин Абаџиев.
