Кошаркарите на ТФТ не успеаја да обезбедат историски пласман во АБА лигата, откако и во вториот натпревар од баражот беа поразени од српскиот Борац Чачак, овојпат во Скопје со убедливи 97:65.
Тимот од Чачак уште еднаш го потврди својот квалитет и со вкупни 2-0 во серијата обезбеди опстанок во регионалното натпреварување, додека македонскиот вицешампион ќе мора да чека нова можност за настап во јадранската елита.
Гостите уште од самиот старт ја презедоа контролата на натпреварот и на полувреме заминаа со висока предност од 52:35, со што практично ги најавија победникот и крајот на серијата.
ТФТ успеа да парира во третиот период, но во последната четвртина постигна само девет поени, што Борац максимално го искористи за убедлива победа во Скопје.
Најефикасен кај ТФТ беше Џастин Гордон со 18 поени, Дејвис додаде 15, а Говенс натпреварот го заврши со 11 поени.
По елиминацијата од АБА баражот, „црно-белите“ сега целосно ќе се насочат кон домашниот шампионат, каде веќе во вторник ги очекува вториот полуфинален натпревар против Маџари, екипа која води со 1-0 во серијата.
