Женскиот кошаркарски клуб Крива Паланка ја освои првата шампионска титула во својата историја, откако во четвртиот натпревар од финалната серија славеше на гостувањето кај Бадел 1862 со 75:73 и со вкупни 3-1 го затвори финалето на плеј-офот во „Шпаркасе Лајф“ Првата лига.
Кошаркарките на Крива Паланка одлично го отворија мечот и уште по првата четвртина имаа убедлива предност од 30:16, најавувајќи дека се подготвени за историски успех. Сепак, Бадел 1862 не се предаде и до полувремето успеа да намали на 42:32.
Во третата четвртина домаќинките целосно се вратија во игра и пред последните десет минути резултатот беше израмнет – 55:55, што донесе голема неизвесност во завршницата.
Крива Паланка повторно се одлепи и поведе со 71:62 на нешто помалку од три минути до крајот, но „баделки“ внесоа нова драматика со серија од 11-3 и по тројката на Чолакоска стигнаа на само поен негатива (73:74). Сепак, времето не беше доволно за комплетен пресврт и гостинките го започнаа големото славје за првата титула во клупската историја.
Голем удел во шампионскиот успех имаше Аби Ниехуес, која беше прогласена за МВП на финалната серија. Крилната кошаркарка и во решавачкиот натпревар одигра доминантно и за речиси 35 минути на теренот постигна 22 поени, имаше 17 скока, од кои седум офанзивни, како и три блокади, со индекс на корисност 32 – највисок на натпреварот.
Иако Бадел 1862 остана без титулата, тимот заслужи големи пофалби за настапите во плеј-офот, особено ако се земе предвид дека во полуфиналето го елиминираше актуелниот шампион Баскет Кам и покажа дека сосема заслужено стигнал до големото финале.
