ГРК Охрид продолжува активно да го гради тимот за новата сезона, а најново засилување на охридскиот клуб е српскиот репрезентативец Никола Зечевиќ, кој потпиша договор со „гладијаторите“ најмалку до 2028 година.
Станува збор за 24-годишен лев бек висок 200 сантиметри, кој во Охрид пристигнува од актуелниот шампион на Србија, РК Партизан. Зечевиќ во српскиот гигант имаше значајна улога во двата правци на теренот, а поради лидерските квалитети ја носеше и капитенската лента.
Со своите настапи во Партизан успеа да се избори и за место меѓу репрезентативците на Србија, за која веќе има повеќе настапи на меѓународната сцена.
Новиот ракометар на Охрид во наредната сезона ќе настапува со дресот со број 31, а по потпишувањето на договорот не го криеше задоволството од новиот предизвик.
„Многу сум среќен и со нетрпение го очекувам мојот прв настап во дресот на Охрид. Не ми беше тешко да ја донесам оваа одлука и да ставам потпис со клубот, со оглед на големите амбиции на клубот кој расте од ден на ден на чело со тренерот Ројевиќ, кого го познавам долги години. Едвај чекам да заиграм пред охридската публика која прави неверојатна атмосфера и се надевам дека ќе ги оправдам очекувањата на сите луѓе во клубот и секако на навивачите и убеден сум дека заедно ќе ги исполниме зацртаните цели.“ – изјави Никола Зечевиќ.
Српскиот интернационалец е четвртото засилување за ГРК Охрид во пресрет на новата сезона, во која клубот има високи амбиции како на домашната, така и на европската сцена.
