Брегалница е на само два натпревари од враќање во Првата македонска фудбалска лига, а искусниот стратег Влатко Костов повторно е пред можност да испише ново златно поглавје во својата богата тренерска кариера.
На две кола до крајот на Втората македонска фудбалска лига, „сините“ од Штип се наоѓаат на врвот на табелата со 65 бодови, исто колку што има и Скопје, но Брегалница е лидер поради подобриот меѓусебен дуел.
До крајот на сезоната штипјани ги очекуваат уште два натпревари – гостување кај Осогово во Кочани, а потоа и домашен дуел против Победа, која веќе е преселена во понизок ранг и нема реални шанси за нешто повеќе.
Доколку Брегалница ги добие двата натпревари, на 23 мај во Штип ќе се слави шампионска титула во Втората лига и големо враќање во прволигашкото друштво.
За Влатко Костов ова би бил уште еден огромен успех, бидејќи искусниот стратег е на чекор по шести пат во кариерата да внесе клуб од Втора во Прва лига, а по вторпат тоа да го направи токму со Брегалница.
Во својата тренерска кариера Костов веќе успеал да обезбеди прволигашки промоции со Хоризонт Турново, Куманово, Осогово, Пелистер и Брегалница, со што важи за еден од најуспешните македонски тренери кога станува збор за враќање екипи во елитата.
Покрај успесите во Втората лига, Костов зад себе има и шампионска титула во Првата лига со Ренова во сезоната 2009/2010, како и трофеј во Купот на Македонија две години подоцна.
Штипската Брегалница и искусниот стратег сега ги делат само 180 минути од нов голем успех, а во Штип веќе се чувствува атмосферата дека елитниот фудбал повторно е многу блиску до градот под Исарот.
