Фудбалерите на Тиквеш, стручниот штаб, докторите и физиотерапевтите на кавадаречкиот клуб денеска покажаа дека спортот не е само резултат и борба на теренот, туку и човечност надвор од него.
При враќањето од Скопје кон Кавадарци, по убедливата победа од 1:4 над Македонија Ѓорче Петров во 31. коло од Првата македонска фудбалска лига, автобусот на Тиквеш запрел на клучката кај Мирковци каде имало сообраќајна несреќа.
Медицинскиот тим на клубот веднаш реагирал и притрчал во помош на повредените лица, со цел да им укаже прва помош до пристигнувањето на надлежните служби, за што ни потврдија од кавадаречкиот прволигаш.
Кавадарчани денеска не само што се радуваа на важен триумф со кој практично ја обезбедија прволигашката иднина и го потврдија директниот опстанок, туку покажаа и голема хуманост и човечка солидарност.
Тиквеш со денешната победа ја прекина негативната серија резултати и сега се наоѓа на петтото место на табелата со 44 бодови, но потегот на кавадарчани надвор од теренот дефинитивно остави најсилен впечаток.
