31. коло во Првата македонска фудбалска лига донесе вистинска драма во битката за опстанок, а по денешните резултати и математички стана јасно дека Македонија Ѓорче Петров и Работнички следната сезона ќе играат во Втората лига.
Најголем удар претрпе Македонија ЃП, која на домашен терен беше убедливо поразена од Тиквеш со 4:1. Кавадарчани одиграа одличен натпревар и уште во првото полувреме најавија сигурен триумф со головите на Виздом Окере и Сила Н’Фанли. Во продолжението Н’Фанли уште еднаш се запиша меѓу стрелците, а Лусијано погоди за 4:0. Единствениот погодок за „лавовите“ го постигна Хозе Перес Кабаркас во самиот финиш.
Во Струмица, АП Брера и Работнички одиграа возбудлив натпревар без победник (2:2), резултат кој беше недоволен за скопскиот тим да ја продолжи надежта за опстанок. Работнички поведе уште во воведните минути преку Дитмир Хоџа, но Никола Величковски со два погодоци направи пресврт за струмичани. Напаѓачот на Брера имаше можност и за хет-трик, но не реализираше пенал откако Фабрис Ондоа го одбрани неговиот удар. Работнички во второто полувреме остана со играч помалку по исклучувањето на Егзон Белица, но и покрај тоа успеа да стигне до бод преку Јован Бошнаков.
Без победник заврши и директниот дуел меѓу Арсими и Башкими (1:1), резултат кој дополнително ја зголеми неизвесноста во борбата за избегнување на баражот. Арсими поведе уште во шестата минута преку Рамадани, а погодокот беше признат по ВАР проверка. Башкими во второто полувреме пропушти пенал преку Никел Ор, кој ја погоди пречката, но истиот фудбалер подоцна со удар со глава донесе израмнување и вреден бод за гостите.
На две кола до крајот ситуацијата на табелата останува максимално неизвесна. Башкими има 41 бод, Арсими 40, Брера Струмица 37, а Пелистер 36 бодови. Во зоната за директно испаѓање веќе се Македонија Ѓорче Петров, Работнички и Шкупи.
