Женскиот фудбалски клуб Тиверија Брера повторно е пред голем предизвик на домашната сцена, откако обезбеди ново финале во Купот на Македонија во женска конкуренција. Струмичанки ќе се борат за трофејот против Каменица Саса, а атмосферата во Струмица веќе најавува вистински фудбалски спектакл.
Градот се мобилизира за големото финале кое ќе се игра на стадионот Стадион Ѓорче Петров, а клубот обезбеди и организиран превоз за сите навивачи кои сакаат да бидат дел од битката за трофејот. Се очекува силна поддршка од трибините, не само од струмичани кои ќе допатуваат од градот, туку и од оние кои живеат во Скопје и околината.
За Тиверија Брера ова ќе биде петто Куп финале во клупската историја и нова можност за освојување на вториот трофеј во ова натпреварување. Првата и засега единствена Куп титула струмичанки ја освоија во сезоната 2017/2018, кога во финалето одиграно во Пехчево убедливо славеа со 5:0 против Драгон. На тој натпревар двоен стрелец беше Александра Терзиски, а во листата на стрелци се запишаа и Теодора Шопов, Рабија Дервиши и Ангела Стојковска.
Низ годините, Тиверија Брера имаше уште неколку обиди да стигне до трофејот. Во сезоната 2016/2017 загуби од Истатов со 4:2 во финалето одиграно во Струмица, потоа во сезоната 2018/2019 беше поразена од Скопје со 3:1, а минатата сезона финалето го загуби од Љуботен со 3:0.
Сепак, овојпат во Струмица владее голем оптимизам. Тимот предводен од Славе Велков игра во одлична форма, а второто место во шампионатот е речиси обезбедено. Дополнителна самодоверба носи и победата од 3:0 против Каменица Саса во рамки на 23. коло од Првата женска фудбалска лига, натпревар на кој струмичанки одиграа одлично.
Сите овие фактори прават вербата во Струмица да биде огромна дека Тиверија Брера има вистинска шанса повторно да го подигне Куп пехарот и по вторпат во историјата да се израдува на трофејот во ова натпреварување.
