Македонија ќе има свои судиски претставници во претстојните бараж натпревари за пласман на Светското првенство, откако Европската ракометна федерација ги објави службените лица за овие дуели.
Судискиот пар Димитар Митревски и Благојче Тодоровски ќе ја делат правдата на еден од најинтересните натпревари во баражот – пресметката меѓу Чешка и Франција, која ќе се одигра во Брно.
Свој претставник Македонија има и меѓу делегатите. Ацо Николовски е назначен за мечот во Подгорица, каде силите ќе ги одмерат селекциите на Црна Гора и Словенија.
Во меѓувреме, македонската репрезентација ќе го започне баражот со гостување кај Словачка во Прешов. За овој натпревар, ЕХФ ги делегираше судиите Анатоли Новиков од Украина и Миндаугас Гателис од Литванија, додека улогата на делегат ќе ја има Чехот Петр Новак.
На овој начин, македонските претставници ќе бидат дел од неколку важни натпревари во борбата за место на светскиот шампионат.
