Женската репрезентација до 16 години триумфално го отвори настапот на УЕФА развојниот турнир што се одржува во Струмица.
Избраничките на селекторката Катерина Милеска ја совладаа репрезентацијата на Сан Марино со 5:0.
Серијата погодоци на мечот што се одигра на теренот на Тренинг центарот Горан Панев ја отвори Христина Јорданова во 30. минута.
Четири минути подоцна Јорданова повторно се запиша меѓу стрелците и зголеми на 2:0, а во претпоследната минута од првото полувреме Тамара Атанасовска и донесе предност на Македонија од 3:0.
По само три минути игра во второто полувреме Ања Каранфиловска постигна гол за водство од 4:0 додека Ана Марија Велевачкоска со голот во 69. минута ги постави конечните 5:0.
Репрезентацијата на Македонија во второто коло ќе се соочи со Андора, натпреварот е на програмата на осми мај, а почетокот е закажан за 12 часот и ќе се игра на стадионот во комплексот Пандев.
