Ракометарите на Охрид продолжија со одличните настапи и на домашната сцена, откако славеа на гостувањето кај Алкалоид со 27-26 во натпревар од плеј-офот во Супер лигата. Само неколку дена по историскиот пласман во финалето на ЕХФ Европскиот Куп, „гладијаторите“ уште еднаш покажаа дека знаат да одговорат и во густ ритам на натпревари.
Дуелот во Автокоманда донесе многу неизвесност и борба, а охриѓани мораа да вложат дополнителен напор за да стигнат до посакуваниот резултат. Заморот беше присутен, но тимот од Охрид одигра зрело и дисциплинирано кога беше најважно.
Во изјава за Спортска Мрежа, ракометарот на Охрид, Давид Савревски, истакна дека станувало збор за тежок и неизвесен натпревар против неговиот поранешен тим, во кој Охрид покажал карактер и заедништво. Тој нагласи дека и покрај згуснатиот распоред, играчите одговориле на предизвикот со борбеност и тимска игра во клучните моменти, што на крајот донело значајна победа.
„Одигравме тежок и неизвесен натпревар против Алкалоид, во кој успеавме да оствариме многу важна победа. И покрај згуснатиот распоред и заморот, сметам дека покажавме карактер, борбеност и тимска игра во клучните моменти, кога беше најпотребно.“- изјави Савревски за Спортска Мрежа.
Со овој триумф, Охрид уште еднаш потврди дека се наоѓа во одлична форма и дека покрај квалитетот, поседува и ментална стабилност – фактор што може да биде клучен во завршницата од сезоната.
