Младата македонска тенисерка Сара Митевска (16 години) со два пехара го заврши настапот на Ј60 ИТФ турнирот Скопје опен 2026 што се играше на терените на ТК Југ во Скопје. Митевска победи во двете конкуренции сингл и двојки на турнир за тенисери и тенисерки до 18 години.
Во финалниот меч Митевска (втора носителка) со пресврт ја совлада првата носителка Ема Чладова од Чешка со 2-1 во сетови (46 64 63). Македонската тенисерка на убедлив начин стигна до финалниот меч, откако во првото коло беше слободна, потоа ја совлада Александра Заплава (Полска) со 2-0 во сетови (61 и 62), а во третото коло беше поуспешна од Милиана Јурева од Русија со 2-0 (60 и 61). Во четвртфиналето ја победи Софи Мотлова (Чешка) со 2-0 во сетови (75 и 62), а во полуфиналето ја победи Софија Велстед од Данска со 2-0 во сетови (63 и 60).
Во конкуренција на двојки Сара Митевска заедно со Нина Тепиќ од Србија како први носителки во финалето во неизвесен меч ги победија Чладова и Мотлова со 2-1 во сетови (36 63 и 10-7 на поени).
Кај момчињата победи Павле Стоиљковиќ од Србија, а тој заедно со Вук Пантиќ Црнцевиќ победија и во конкуренција на двојки.
Од понеделник на терените на ТК Поинтер се одржува турнир Ј30 Скопје Поинтер Опен 2026, каде како први носители се Сара Митевска кај девојчињата и Кристијан Јанев кај момчињата.
