Екипата на Проект од Јосифово ја заврши својата доминанта сезона со максимален учинок, без пораз ја освои двојната круна, односно шампионската титула и Куп трофејот.
Тотална доминација, на сите натпревари Проект буквално ги торпедираше противниците и не им дозволуваше да се надеваат ниту да парираат.
18 победи од толку натпревари во Првата футсал лига, 159 постигнати погодоци, неверојатна бројка, само 33 примени погодоци за гол разлика од +126 и максимално 54 освоени бодови.
Доминација и во финале од Купот на Македонија каде со 8:3 Проект го „збриша“ Кеги Моби и го подигна Куп трофејот.
Сега тимот од Јосифово со фокус ќе биде на европските предизвици и квалификациите во Лигата на шампионите.
Вечерва во Валандово шампионот Проект го одигра последниот меч за оваа сезона, а истиот го доби со убедливи 10:1 над Бутел. Двојни стрелци беа Кристијан Гавровски, Димитар Јанев и најдобиот стрелец на тимот Марио Благојевски, по еден гол постигнаа Бојан Јанев, Горан Стојанов, Давид Ристовски и Трајче Димитриев. За скопскиот тим единствен стрелец беше Никола Илијоски.
