Ракометниот клуб Охрид продолжува да ја живее својата европска бајка, а големиот успех – пласманот во финалето на ЕХФ Европскиот Куп – не помина незабележано во македонската ракометна јавност.
„Црвено-црните“ јавно му честитаа на Охрид за историскиот пласман, испраќајќи порака дека ваквите успеси се гордост за целиот македонски спорт.
„Пласманот во едно европско финале е потврда за квалитет, посветеност, работа и верба, а воедно и гордост за сите што го следат и сакаат ракометот во Македонија. На РК Охрид му посакуваме многу среќа во финалето, достоинствен настап и уште еден голем момент за македонскиот спорт“, порачаа од Вардар.
Покрај скопскиот гигант, поддршка за „гладијаторите“ пристигна и од други домашни клубови. Еурофарм Пелистер, Бутел Скопје и Куманово преку социјалните мрежи го поздравија успехот на охриѓани, а дел од честитките пристигнале и директно од раководствата на клубовите веднаш по натпреварот.
Охрид до финалето стигна по драматична полуфинална пресметка со словенечки Целје. По поразот од 27-26 на првиот меч, охриѓани возвратија со идентична мера на домашен терен, а според правилата на ЕХФ, патникот во финалето беше решен преку пенали – каде Охрид славеше со 29-27.
Во финалето од ова натпреварување, македонскиот претставник ќе се соочи со унгарскиот тим Татабања, за кој настапува македонскиот репрезентативец Филип Талески.
