Две дерби пресметки во Првата женска фудбалска лига носи 23. коло, а кои соочувања ќе решаваат за второто место на табелата.
Во Струмица ќе се соочат Тиверија Брера и Каменица Саса, меч каде струмичанки ќе мораат до трите бодови со цел да го сочуваат второто место, додека пак „рударите“ и со три бодови од Струмица нема да може да напредуваат на табелата односно ќе останат петти.
На Пржино ќе се игра дерби меѓу Истатов и Љуботен, борба за трите бодови и за второто место на табелата. Ако Истатов слави, а притоа во Струмица трите бодови ги освои Саса тогаш „истатовки“ ќе се израмнат на второто место, во случај на триумф и на Љуботен ќе значи дека тимот од Тетово ќе биде втор.
Лидерот и нов шампион Скопје ќе има лесна задача против Топ Гол на домашен терен каде прашање е само со колкава разлика ќе триумфира тимот од Пржино.
Ас Јунајтед како фаворит во Струга ќе го пречека тимот на Речица, додека пак Вардар и Кочани ќе одиграат еден неизвесен меч каде скопскиот тим е фаворит, а гостинот ќе бара бодови за да го обезбеди баражот и преку истиот да бара опстанок во Првата лига.
