Третото место веќе е недостижно за Силекс, па кратовскиот тим речиси сигурно сезоната ќе ја заврши на четвртата позиција во ПМФЛ. Поради тоа, целото внимание на избраниците на Александар Васоски е насочено кон Купот на Македонија.
Во ваква ситуација, Силекс без резултатски притисок ќе влезе во дуелот со Шкендија, со намера да и го отежне патот. Иако натпреварот нема значајно влијание врз нивниот пласман, од таборот на кратовци најавуваат максимална борба до крајот на сезоната, со цел да освојат што повеќе бодови и да се обидат да приредат изненадување.
„Не очекува еден добар натпревар против квалитетен противник како што е Шкендија. Иако шансите за тоа трето место се минимални, ние на секој натпревар ќе играме како до сега, и ќе одиме на победа. Секако дека фокусот ни е во Купот, но и во првенството сакаме да освоиме што повеќе бодови. Шкендија е во трка за титулата, но нас тоа не ни значи ништо. Гледаме само за нас, и на секој натпревар до крајот, без разлика на противникот, ќе се надигруваме и ќе се обидеме да освоиме што повеќе бодови“, изјави капитенот на Силекс, Дарко Ангелески.
