Горан Стојанов беше едно од најзвучните имиња во големото финале од Купот на Македонија во футсал, каде со хет-трик го предводеше Проект до убедлива победа од 8:3 против Кеги Моби и освојување на трофејот.
25-годишниот футсалер од Радовиш го отвори резултатот уште во раната фаза од натпреварот, а потоа со уште два погодоци го заокружи своето фантастично издание и го трасираше патот кон убедливиот триумф на тимот од Јосифово. Проект доминираше од почеток до крај, комплетирајќи ја двојната круна по веќе освоената шампионска титула.
Во текот на сезоната, Стојанов има значајна улога во составот на шампионот. Во Првата футсал лига, на едно коло до крајот има постигнато 14 голови, со што е трет стрелец во тимот, додека во Купот токму неговите три гола од финалето беа клучни за освојување на трофејот.
По натпреварот, Стојанов не го криеше задоволството од успехот, за Спортска Мрежа истакна дека ова за него е убаво чувство.
„За мене оваа претставува едно убаво чувство, освоени шампионската и Куп титулата, финале кое ќе го паметам секогаш со постигнати три погодоци. Натпреварот беше одличен, задоволен сум од тоа како се прикажав и јас и мојот тим и сосема заслужено стигнавме до овој голем триумф. Секако и на последниот меч од првенството одиме по победа и да ја затвориме сезоната со максимален ефект, а потоа да се фокусираме на европските предизвици“, изјави Горан Стојанов за Спортска Мрежа.
Со вакво издание во финалето, Стојанов уште еднаш потврди дека е еден од клучните играчи на Проект, тим кој оваа сезона остави силен печат на македонската футсал сцена.
