Ракометарите на ГРК Охрид претрпеа минимален пораз од 27-26 на гостувањето кај Целје во првиот полуфинален натпревар од ЕХФ Европскиот куп. Иако одиграа меч со големи осцилации, избраниците на Борис Ројевиќ во финишот покажаа карактер и се изборија за активен резултат пред реваншот на домашен терен на 2 мај.
Охриѓани имаа одличен старт на натпреварот и со серија од 0-6, предводени од Тасески, Ојлески, Иванковиќ и Стрмљан, целосно го изненадија домаќинот. Во првите 17 минути македонскиот тим ја контролираше играта и резултатот, имајќи предност и од 10-7.
Сепак, следуваше пад во играта на Охрид. Целје успеа да се врати во мечот и со серија од 8-0 направи комплетен пресврт. Охриѓани цели 11 минути не постигнаа погодок, што домаќините го искористија за водство од 15-11 на полувремето.
Во второто полувреме Целје ја зголеми предноста и во еден момент имаше и максимални „плус седум“ (22-15), но Охрид не се предаде. Со зацврстена одбрана и подобра реализација, македонскиот тим постепено ја намалуваше разликата.
Во неизвесната завршница, Охрид имаше и шанси да дојде до уште поповолен резултат, но не ги искористи клучните напади. Сепак, во последните секунди Дарко Ѓукиќ погоди од крило за конечни 27-26, оставајќи го двомечот целосно отворен.
Најефикасен на натпреварот беше Анжиќ со осум гола, додека кај Охрид се истакнаа Ѓукиќ со пет погодоци, како и Иванковиќ и Стрмљан со по четири.
Реваншот во Охрид ќе биде решавачки за пласман во финалето, а македонскиот претставник ќе има реална шанса да ја надополни минималната негатива.
