Македонија Ѓ.П. го совлада Работнички со 2:1 во натпреварот од 29. коло во Првата МФЛ и освои исклучително важни три бода во битката за опстанок. „Лавовите“ со овој триумф остануваат во игра за зачувување на прволигашкиот статус.
Домашниот тим поведе уште во втората минута, кога по едно нафрлување Кабаркас најдобро се снајде во шеснаесетникот и со удар со глава ја затресе мрежата на Работнички. Гостите се обидоа брзо да возвратат, па во 14. минута Сухељ Мухарем имаше добра можност за израмнување, но неговиот удар заврши непрецизно.
Македонија Ѓ.П. продолжи да притиска, а во 22. минута Лазаревиќ по корнер ја погоди гредата. Само една минута подоцна и Софијаноски со удар со глава ја затресе рамката од голот. Темпото на игра остана високо, со шанси на двете страни, сè до 63. минута кога Џангаровски со одличен соло продор зголеми на 2:0.
Работнички не се предаде и веќе во 68. минута успеа да намали преку Сухељ Мухарем, кој погоди од непосредна близина за 2:1. До крајот на натпреварот гостите се обидуваа да стигнат до израмнување, а најблиску беше Манојлов во 78. минута, но не успеа да реализира.
Со оваа победа, Македонија Ѓ.П. останува претпоследна на табелата со 27 бодови, само еден помалку од Работнички и два од Пелистер, кој се наоѓа над зоната за бараж. До крајот на сезоната остануваат уште четири кола, а во следното Македонија Ѓ.П. ќе гостува кај Шкупи, додека Работнички го очекува директен дуел со Пелистер.
