Женскиот фудбалски клуб Партизан од Белград направи тренерска промена, откако ја прекина соработката со досегашниот шеф на стручниот штаб, Горан Никиќ. Од клубот му се заблагодарија за ангажманот и му посакаа успех во понатамошната кариера.
Нов предводник на белградскиот клуб е искусниот стратег Милан Стојаноски, добро познато име на фудбалската сцена како поранешен играч на Партизан. Новиот тренер на српскиот тим до пред неколку недели го водеше македонскиот прволигаш Пелистер.
Стојаноски зад себе има богата играчка кариера, во која како дел од „црно-белите“ настапуваше и во Лигата на шампионите, освојувајќи три шампионски титули и еден Куп. Во домашното првенство одигра речиси 300 натпревари и постигна 50 голови, а за репрезентацијата на Македонија забележа 27 настапи.
Како тренер со УЕФА Про лиценца, Стојаноски има искуство со повеќе клубови, меѓу кои ИМТ, Телептик, Зрењанин, како и македонскиот прволигаш Пелистер Битола.
Со неговото назначување, Партизан добива искусен фудбалски работник, а од клубот изразија големо задоволство што токму тој ќе ја предводи екипата во новата етапа од развојот.
