Фудбалерот на Сатеска од Волино, Никола Секулоски е гол-машина во Трета лига – Југозапад, откако во досегашниот тек од сезоната постигна фантастични 21 гол, а повеќе од сигурно е дека 30-годишникот нема да застане на оваа бројка.
Во минатото Секулоски покрај за Сатеска од Волино настапуваше и за Охрид, струшки Караорман, кичевски Напредок и Велешта.
Сатеска е на 3. место на табелата со 23 бодови со само два бода помалку од лидерот Преспа, а еден помалку од Кораби кој е втор и сериозно конкурира за првото место и баражот за Втора лига.
Нападот на Сатеска на 10 одиграни натпревари има реализирано 37 погодоци, со што тој е најефикасниот, а од нив 21 се дело токму на Секулоски.
Со ваква доманинација сигурно е дека Сатеска од Волино сака Втора лига и продолжува да доминира од натпревар во натпревар. Практично овие три екипи ќе ја водат борбата за првото место, бидејќи веќе се одвоија на табелата со посериозна бодовна дистанца.
Во однос на листата на стрелци Никола Секулоски е на врвот од истата со 21 гол, Темур Емини од Кравари и Фатјон Леши од Кораби имаат по девет гола.
По осум погодоци постигнаа Владе Јанакиевски од Евротип и Нико Пластиновски од лидерот Преспа.
По седум погодоци имаат Насер Доко од Влазними, Мартин Кузманов од Евротип, Неџми Реџепи од Преспа и Денис Шадов од Влазними.
Четири фудбалери си постигнале автоголови односно Ермир Нура од Велешта, Валентино Петрески од Демир Хисар, Ристо Целакоски од Славеј од Мешеишта и Никола Шеровски од Светлост.
По завршувањето на есенскиот дел Спортска Мрежа ексклузивно ќе ја објави во целост листата на најдобри стрелци во Трета лига – Југозапад.
