Подготовките на машката сениорска репрезентација на Македонија за настапот во Европската лига 2026 ќе започнат една недела порано од првично планираното. Селекторот Јошко Миленкоски побара промена во распоредот, која беше одобрена од страна на Одбојкарска федерација на Македонија.
Првиот собир на репрезентативците е закажан за 6 мај во Крушево, каде ќе се реализира почетниот дел од подготовките.
Ова натпреварување има двојно значење за македонската селекција – како почеток на квалификацискиот циклус за Европското првенство 2028, но и како важен сегмент од подготовките за настапот на Европско првенство во одбојка 2026, кое ќе се одржи во септември во Софија.
По подготовките во Крушево, од 13 мај репрезентацијата се сели во Скопје, каде во СЦ „Борис Трајковски“ ќе тренира во наредните две недели.
Финалната проверка на формата ќе следува со пријателски натпревари против Црна Гора, во периодот од 27 до 29 мај во Подгорица.
Македонија ќе го отвори настапот во Европската лига на домашен терен, во салата „Парк“ во Струмица. Првиот натпревар е закажан за 5 јуни против Холандија, додека на 7 јуни следува дуел со Луксембург.
Вториот турнир ќе се одигра во Атина, каде Македонија на 13 јуни ќе се соочи со Исланд, а ден подоцна ќе игра против домаќинот Грција.
Третиот турнир е закажан во Гњилане, каде на 19 јуни македонските одбојкари ќе се сретнат со Косово, а на 20 јуни ќе одиграат натпревар против Израел.
