МКК Куманово со многу мака стигна до важни бодови во Плеј-аут фазата, откако на домашен терен го совлада Гостивар со минимални 75:73 во натпревар со неизвесна завршница.
Иако „сино-белите“ имаа контрола во поголемиот дел од средбата и по три четвртини водеа со убедливи 60:50, гостите од Гостивар не се предадоа. Напротив, во последниот период успеаја да ја стопат разликата, па дури и да се вратат целосно во игра и да внесат неизвесност во финишот.
Драмата кулминираше во последните моменти. По загубена топка на Стевановиќ, Димитриевски израмни на 73:73, но во клучниот напад, на само девет секунди до крајот, Стојан Ѓуроски презеде одговорност и погоди за водство од 75:73.
Гостивар имаше последен напад за пресврт, но Столески не успеа да реализира за три поени и да донесе сензација во Куманово, па бодовите останаа кај домаќинот.
Најефикасен кај победникот беше Луковиќ со 27 поени и 14 скока, додека Стевановиќ придонесе со 13 поени, осум асистенции и пет скока. Кај Гостивар, Димитриевски запиша 16 поени и девет скока, Младеновиќ додаде 15 поени и шест асистенции, а Црниќ и Грегори постигнаа 11, односно 10 поени.
Со овој триумф, Куманово дојде до скор 11-12 и направи важен чекор во битката за опстанок, додека Гостивар останува на 6-17 и со се помали шанси да се извлече од незавидната позиција.
