Охрид продолжува со одличната форма и по триумфот во Битола, „гладијаторите“ запишаа уште една убедлива победа на домашен терен. Овојпат беше совладан Тиквеш со 37-20 (19-14), во натпревар во кој посебно внимание привлече дебито на новото засилување од Јапонија, Косуке Јасухира.
Јапонскиот интернационалец остави одличен прв впечаток, постигнувајќи 6 гола и забележувајќи дури 8 асистенции, а по натпреварот не го криеше задоволството од дебито и првите впечатоци од клубот и средината. Во изјава ексклузивно за Спортска Мрежа, Јасухира говореше за своето деби, адаптацијата и очекувањата до крајот на сезоната.
„Се чувствувам многу добро, ми се допаѓа градот, животот тука, фановите, атмосферата..и луѓето се многу добри. Ова беше моето деби за Охрид и многу сум среќен, иако мислам дека не играв со 100%..секако ми треба време да се привикнам на стилот на игра, но сепак се надевам дека ги оправдав очекувањата и дека ќе бидам сè подобар и подобар во остатокот од сезоната.”- изјави Јасухира за Спортска Мрежа.
Со ваков старт и позитивен пристап, Јасухира најавува дека ќе биде сериозно засилување за Охрид во продолжението од сезоната, во која „гладијаторите“ ќе се обидат да ја задржат високата позиција и да останат во трката за врвот.
