29-годишниот напаѓач Тоше Манов продолжува со извонредните настапи во дресот на Овче Поле, откако во дербито од 16. коло во Третата лига – Исток постигна погодок каков што ретко се гледа на фудбалските терени.
Овче Поле славеше убедлива победа од 3:6 на гостувањето кај Ударник во Пирава, а Манов беше во центарот на вниманието со хет-трик. Сепак, посебно се издвои неговиот погодок постигнат директно од центарот на теренот.
Најдобриот стрелец во источната група, кој сега има вкупно 18 погодоци, со одличен преглед на играта и прецизен удар го изненади противничкиот голман и ја погоди мрежата, предизвикувајќи воодушевување кај присутната публика.
Голманот на Ударник, Филип Лазаров, остана без вистинска реакција, немоќен да интервенира при овој мајсторски обид.
Со оваа партија, Манов дополнително ја зацврсти лидерската позиција на листата на стрелци, со дури осум голови повеќе од второпласираниот Дејан Блажевски од Хоризонт Турново, кој има постигнато 10 погодоци.
