Осогово со огромна победа го потврдува опстанокот, Форца го доби мечот со Кеги Моби, важен бод за Јувентус Серава

Веќе сè е јасно во Првата футсал лига откако комплетирањето на 15. коло донесе резултати со што се става печат и на екипите кои ќе испаднат во Втора лига.

Во натпреварот кој живот значеше за Балкан, дебитантот загуби во Крива Паланка од Осогово со резултат од 12:8 – дури дваесет погодоци го решаваат натпреварот за опстанок.

Како победник излезе Осогово, но не само тоа, туку ланскиот финалист од Купот го потврдува опстанокот и за следната сезона.

Виктор Димков постигна дури пет погоди за Осогово, двојни стрелци беа Михаил Павловски и Бојан Иванов, а пак хет-трик забележа Кристијан Станојковски.

За гостинската екипа по двапати погодија Пајтим Реџепи, Фестим Балиќи и Јусуф Сулејмани, додека пак по еден гол имаа Хакан Умер и искусниот Таулант Исмаили.

Јувентус Серава стигна до гол бод во мечот со Бутел со што и овој тим веќе го потврдува опстанокот во елитата – исходот беше 2:2.

Гостинот преку двата гола на Исмаил Абдуловски најпрво во 32. минута го отвори резултатот, а во 37. минута стигна до 0:2. Сепак, Иван Крстевски им ја скрати радоста на гостите со два гола во 38. и 39. минута за конечни 2:2.

Во Куманово се одигра дерби меч на Форца и Кеги Моби каде ланскиот шампион со 9:5 беше подобар од велешкиот тим.

Стрелци на по три гола за Форца беа Руфат Чалафи и Берат Рамадани, а пак Артан Јунузи постигна два гола, а еден гол беше дело на Биљали Хасан. За гостинскиот тим во првиот дел погодија Бобан Дукадиновски и Стефан Димовски, а во вториот дел стрелаа Димче Андов, Марио Панев и Петар Левков.

До крајот остануваат да се одиграат три кола, а во игра се девет бодови, веќе во следното коло и официјално ќе се потврди испаѓањето на Балкан и Мал Ајакс, а тоа за овие две екипи ќе значи експресно враќање во Втора лига.