Македонскиот боксер Ален Рустемовски го освои третото место на меѓународниот турнир Elite Montenegro Cup, кој се одржа во периодот од 14 до 21 март со учество на 20 држави.
Рустемовски обезбеди бронзен медал, откако поради повреда на аркадата беше спречен да настапи во полуфиналето.
За жал, мојот настап беше прекинат поради повреда- во четвртфиналниот меч добив удар со глава и заработив сериозна расекотина на аркадата (5 цм), поради што не бев во можност да настапам во полуфиналето. Жал ми што не продолжив до финале, особено затоа што противникот од Грција веќе го имам победувано и знам дека можев да одам до крај. Но здравјето е на прво место- се враќам посилен и помотивиран. Голема благодарност до моите спонзори кои стојат зад мене и ме поддржуваат на секој чекор. Ова е само уште една лекција и чекор напред. Наскоро се враќам во рингот – изјави Рустемовски.
И покрај незгодната повреда, овој резултат претставува уште една потврда за квалитетот и потенцијалот на Рустемовски, кој продолжува да ја претставува Македонија на меѓународната сцена со голема посветеност. Очекувањата се дека по закрепнувањето ќе се врати уште посилен и ќе атакува на нови успеси и медали.
