Два прволигаши и два второлигаши ќе се борат за влез во големото финале од Купот на Македонија, а освојувањето на Куп титулата значи и билет за излез во Европа односно играње во квалификациите за Конференциска лига на УЕФА.
Токму затоа борбата за полуфиналето за влез во финалето ќе биде голема, а досега има две големи изненадувања.
Во полуфиналето ќе се соочат второлигашот Охрид против прволигашот Силекс. „Рибарите“ за првпат обезбедија полуфинале со што веќе испишаа клупски успех, а сега налетаа на тимот од Кратово кој во минатото трипати го освојуваше Купот на Македонија.
Првата Куп титула тимот од Кратово ја освои во далечната 1994 година, а втората во 1997 година, потоа чекаше долги години за да ја освои третата Куп титула во 2021 година.
Силекс двапати играше и финале – 1995 и 2022 година.
Охрид во полуфиналето стигна откако го елиминираше бранителот Вардар преку пенал рулетот, а пак Силекс убедливо го доби второлигашот Детонит Плачковица.
Во вториот полуфинале дуел ќе се соочат второлигашот Шкендија Арачиново и Шкендија од Тетово. Тимот од Арачиново веќе испиша клупски успех пласирајќи се во полуфиналето, каде ќе се обиде да направи ново изненадување против далеку поквалитетен тим, бидејќи актуелниот шампион во ПМФЛ ќе важи за голем фаворит.
Шкендија зад себе има две Куп титули освоени во 2016 и 2018 година, а тетовци дури трипати беа поразени во финалињата – 2006, 2013 и 2017 година.
Доколку Шкендија ја освои Куп титулата, а притоа заврши на второто место или пак ја одбрани шампионската титула, тогаш третопласираната екипа ќе обезбеди излез во Европа, во случајот тоа ќе биде Струга, која беше елиминирана токму од Шкендија.
Екипата на Шкендија Арачиново место во полуфиналето обезбеди откако го исфрли прволигашот Работнички во четвртфиналето.
