Ракометната федерација на Македонија донесе одлука за скандалозниот натпревар од женскиот Куп на Македонија меѓу Скопје и Гевгелија каде ракометарките си даваа автоголови, но и наводно намерно го промашувале голот на противникот.
Според одлуката на РФМ, ЖРК Скопје и ЖРК Гевгелија се исклуени од сите натпреварувања под капата на Ракометната федерација на Македонија.
Дополнително, суспензија добија и офцијалните лица на двата клуба, но и делегатот.
Валентина Радуловиќ како претседател на ЖРК Скопје, доби суспензија односно забрана за вршење на функција во ракометот во следните две години, а исто казна добива и тренерот на екипата, Веселинка Треноска.
Претседателот на ЖРК Гевгелија, Јулија Беќарова, исто така добива забрана за вршење на ракометна функција во период од следните две години, а пак делегатот на натпреварот Митко Ѓоргиевски е казнет со забрана за вршење на оваа функција во следните шест месеци.
Како што веќе информираше Спортска Мрежа на натпреварот од Купот на Македонија ракометарките на двете екипи си постигнуваа автоголови, за што може да се види и од снимките на самиот натпревар, а ваквиот голем срамен скандал не само што ја стресе ракометна Македонија, туку за ваквиот срамен скандал известуваше цел Балкан.
