Женската фудбалска репрезентација на Македонија ја забележа првата победа во квалификацискиот циклус за пласман на Светското првенство, откако на стадионот „Петар Милошевски“ во Битола славеше убедливо против Андора со 3:0.
Фудбалерите на селекторот Александар Андов одиграа сигурен натпревар и со добра игра стигнаа до заслужени три бода. Резултатот го отвори Теона Галабовска во 17. минута по асистенција на Марковска, а само три минути подоцна следуваше и втор погодок. Овојпат Галабовска беше во улога на асистент, а Симона Мејер успешно ја зголеми предноста на 2:0.
Во продолжението од натпреварот нашата селекција ја контролираше играта и не му дозволи на противникот сериозно да се закани. Конечниот резултат беше поставен во 83. минута кога младата Меланија Грозданова постигна прекрасен погодок за конечни 3:0.
Трите голови на овој натпревар ги постигнаа млади фудбалерки кои се сметаат за иднината на македонскиот женски фудбал – 20-годишната Симона Мејер, 18-годишната Теона Галабовска и 17-годишната Меланија Грозданова.
Селекторот на македонската репрезентација, Александар Андов, по натпреварот истакна дека е горд на своите избранички, според него најдоброто од овие фудбалерки допрва доаѓа.
Следниот предизвик за македонската селекција во квалификациите ќе биде дуелот против Унгарија, кој е закажан за 14 април.
