Првата група македонски државјани кои беа евакуирани од Израел безбедно пристигна во Скопје, откако претходно преку Египет беше организиран нивниот транспорт до Македонија.
Станува збор за шестмина македонски граѓани кои од Израел најпрво заминале по копнен пат кон Египет, а оттаму со авионски лет се упатиле кон Скопје. Меѓу нив беше и поранешниот македонски ракометен репрезентативец Горан Крстевски, кој неодамна настапуваше во израелскиот клуб Нес Зиона.
Крстевски во вториот дел од сезоната ја продолжи кариерата во Израел и имаше солиден настап во дресот на Нес Зиона, но актуелната безбедносна ситуација на Блискиот Исток доведе до прекин на неговиот престој таму.
На скопскиот аеродром евакуираните ги пречека заменик-министерот за надворешни работи и надворешна трговија Зоран Димитровски, кој посочи дека акцијата за нивно извлекување била сложена и реализирана во координација со дипломатско-конзуларните претставништва.
Во Израел настапуваше и уште еден македонски ракометар, Христи Бикоски, кој во меѓувреме се вратил во Македонија со лет организиран од Србија.
