По стартот на плеј-оф фазата во македонската Супер Лига, ракометарите на ГРК Охрид, викендов ги продолжуваат обврските, но овојпат во рамки на Купот на Македонија. Охриѓани, како домаќини во Групата Б, ќе се соочат со познатиот ривал- ГРК Тиквеш 2014, во меч кој носи директна борба за пласман во финалето на групата.
Дуелот меѓу Охрид и Тиквеш се игра во петок (06.03) од 18:00 часот во спортската сала „Билјанини извори“. Подобриот од оваа пресметка ќе обезбеди место во неделното финале во групата, каде ќе се соочи со победникот од натпреварот меѓу Куманово и Младост Богданци, кој ќе се игра во недела.
Системот е јасен – нема простор за поправен, па концентрацијата и пристапот од првата минута ќе бидат клучни за амбициите на тимот од Охрид.
Пикерот на охриѓани- Иван Тасески потенцира дека тимот размислува чекор по чекор, со целосен фокус на првиот натпревар. Според него, цврстата одбрана од самиот старт ќе биде основа за посакуваната победа и пласман во следната рунда, каде ќе го чекаат подобриот од другиот дуел во групата.
„Овој викенд ги играме натпреварите од групната фаза на Купот на Македонија. Одиме натпревар по натпревар, фокусирани сме на овој меч, со добра одбрана од самиот почеток на натпреварот да извојуваме победа и да го чекаме победникот од другиот натпревар.“- изјави Тасески.
Куп-натпреварите секогаш носат дополнителна тежина и неизвесност, а за Охрид ова е можност да ја потврди стабилноста и сериозните амбиции уште на почетокот од елиминациската фаза. Првиот чекор е Тиквеш – сè друго ќе зависи од тоа како ќе изгледаат „рибарите“ во петок.
