Фудбалска федерација на Македонија организира стручен семинар на тема „Повреди и дијагнози во фудбалот и нивно менаџирање“, наменет за докторите и физиотерапевтите од клубовите во Првата и Втората МФЛ, Футсал Првата лига и ЖМФЛ, како и за медицинските тимови на националните селекции.
Семинарот ќе се одржи на 7 и 8 март 2026 година во хотел „Holiday Inn Skopje“ во Скопје, каде во текот на два дена ќе се обработуваат актуелни теми поврзани со спортската медицина во фудбалот.
На отворањето свое обраќање ќе има претседавачот на Комисијата за медицински прашања и анти-допинг при ФФМ, д-р Небојша Настов. Со стручни предавања и активно учество ќе настапат и д-р Александар Милески, доктор во А репрезентацијата, д-р Михајло Ивановски, доктор во А и репрезентацијата до 21 година, д-р Лабинот Бехтеши, д-р Мартин Христов, како и физиотерапевтите во А репрезентацијата, Бојан Цаневски и Срѓан Димитриевски.
Целта на семинарот е размена на професионални искуства, унапредување на медицинските протоколи и примена на современи методи во дијагностика, третман и рехабилитација на спортските повреди, како и зацврстување на соработката меѓу медицинските тимови на клупско и репрезентативно ниво.
